ОКУУ ЖАЙДА ТОО МАСЕЛЕЛЕРИ ЖАНА КЛИМАТТЫН ӨЗГӨРҮҮСҮ БОЮНЧА ТЕГЕРЕК СТОЛ ӨТКӨРҮЛДҮ

2024-жылдын 1-октябрынан 12-октябрына чейин Ош мамлекеттик педагогикалык университетинде “Тоо маселелери жана климаттын өзгөрүүсү” аталышында 10 күндүк иш чаралар пландалды.

Анын алкагында 1-октябрь күнү колледжде “Климаттын өзгөрүүсүнүн себептери”, “Климаттын өзгөрүүсүнүн тоо экосистемаларына тийгизген таасири” аталышында тегерек стол уюштурулду.

Ага улук инспекторлор Нурсултан Имомали уулу, Уланкадыр Баймамат уулу, илимий иштер боюнча проректор Равшан Абсатаров, дене тарбия жана табигый илимдер кафедрасынын биология жана география предметинин окутуучулары, студенттер катышты.

Тегерек столдо соңку жылдардагы дүйнө жүзүндө болуп жаткан климаттык өзгөрүүлөрдүн себептери, анын өзгөрүүсүнүн тоо экосистемасына тийгизген терс таасири, климаттын өзгөрүүсүнө адаптациялануу, алдын алуу жана чечүү маселелери талкууга коюлду.

Саамалык студенттердин жана коомчулуктун экологиялык сабаттуулугун жана маданияттуулугун жогорулатуу, жаратылышты жана айлана-чөйрөнү коргоого тарбиялоо максатында уюштурулуп, алдыда дагы да тегерек столдор жана лекциялар өткөрүлөт.