ОшМПУ УЛУТТУК ЛИГАДА 1-ОРУН!

Ош мамлекеттик педагогикалык университетинин балдар командасы Республикалык универсиаданын волейбол боюнча улуттук лигасында жеңишке жетишти. Жеңүүчүлөр алдыда Германияда өтүүчү студенттердин эл аралык волейбол мелдешине жолдомо алышты.

Аталган унивесиада дене тарбия жана спорттун түптөлгөндүгүнүн 100 жылдык мааракесине карата уюштурулуп, бул жылы волейболдун ХVII чемпионаты өттү. Ага өлкө ичиндеги жогорку окуу жайларынын командалары активдүү катышып, финалдык оюнда Дене тарбия академиясы менен бирге ОшМПУнун командасы беттешти.

Чемпионатта студенттер Акылбек уулу Бекжан, Аскаров Шабдан, Нуркамалов Айдар, Турганбаев Марсел, Алымов Амантур, Арапбаев Дениз, Сатарбеков Шеримбет, Таирбек уулу Курбанали, Осонов Арсен, Мустафакулов Исхак окуу жайдын намысын коргошту. Ал эми машыктыруучу Данияр Осмоналиев болду.

Белгилей кетсек универсиада 6-апрель Эл аралык спорт күнү менен Кыргыз Республикасынын дене тарбия жана спорт кызматкерлеринин күнүнө карата уюштурулду.