ОшМПУнун ректору Республикалык мелдештин чемпиондорун куттуктады

Бүгүн Ош мамлекеттик педагогикалык университетинин ректору Бекмурза Зулуев Республикалык универсиаданын волейбол боюнча жогорку лигасында жеңиш менен келген студенттерди кабыл алып, жетекчиликтин атынан куттуктады.

Мында ректор мелдештен зор ийгилик менен келген спортчуларды кызуу куттуктап, алардын тарых жараткандыгын айтып, мындан ары окуу жайдын атын дүйнөгө чыгара беришине тилектеш экендигин билдирди. Ошондой эле алардын бул ийгилиги болочок спортчулардын дагы да алдыга кадам таштоосуна бир топ стимул боло ала тургандыгын баса белгилеп, кубанычта экенин кошумчалады. Ошондой эле университеттин дене тарбия факультетинин ардактуу окутуучусу Мурзаш Жумабаев жеңиш ээлерине жана машыктыруучусуна ак батасын берип, алкады.

Аталган универсиада борбор калаадагы Кааба уулу Кожомкул атындагы спорт ордосунда өткөрүлүп, анда өлкө ичиндеги жогорку окуу жайлардан волейбол боюнча 12 команда катышкан. Натыйжада 3-орунду Ишеналы Арабаев атындагы Кыргыз мамлекеттик университети, 2-орунду Б.Турусбеков атындагы Кыргыз мамлекеттик дене тарбия жана спорт академиясы, ал эми 1-орунду Ош мамлекеттик педагогикалык университети камсыздаган. Алдыда окуу жайдын чемпиондору Германия өлкөсүндө өткөрүлүүчү дүйнөлүк мелдеште өлкөнүн намысын коргошот.