БАКАЛАВР ДАРАЖАСЫН АЛУУ ҮЧҮН КОЛЛЕДЖДИН СТУДЕНТТЕРИНЕ АРНАЛГАН КЕСИПКЕ БАГЫТ БЕРҮҮ ИШ ЧАРАСЫ ӨТТҮ

Бүгүн Ош мамлекеттик педагогикалык университетинде гуманитардык факультети тарабынан бакалавр академиялык даражасын алуу үчүн кесипке багыт берүү иш чарасы өткөрүлдү.

Саамалык “Кош кел, бүтүрүүчү!” аталышында болуп, ага университеттин профессордук-окутуучулук жамааты жана колледждин студенттери катышты. Мында алгач гуманитардык факультетинин деканы Нурбек Маткаримов сөзгө чыгып, аталган факультеттин артыкчылыктары, андагы адистиктер, түрдүү багыттар, ага керектелүүчү документтер, мобилдүүлүк программасы, студентер үчүн түзүлгөн мүмкүнчүлүктөр, тил билүүнүн пайдасы тууралуу кеңири маалымат берди.

Аны улай катышуучуларга англис тили жана аны окутуунун усулу кафедрасы боюнча видео тасма көрсөтүлүп, гуманитардык факультетинин студенттеринин концерттик программасы менен коштолду. Мында таланттуу студенттер бий бийлеп, студенттик күндөрдү чагылдырган тамашаларды аткарып, англис жана кыргыз тилинде жагымдуу чыгармаларды аткарышты. Иш чара шаңдуу атмосфера менен коштолуп, көрүүчүлөрдүн купулуна толду.

Мындан сырткары катышуучулар тест белгилешип, анын жыйынтыгында жеңүчү аталган студенттерге окууга тапшырууга жеңилдик багытындагы сертификаттар тапшырылды. Ошондой эле гуманитардык факультети тууралуу маалымат баракчалары таркатылып, колледжден бүтүп келип, бакалавр бөлумүндө окуган студенттер өз пикири менен ой бөлүштү.