ОшМПУ БАУнун Кесиптик жана үзгүлтүксүз билим берүү мектеби менен кызматташат

Ош мамлекеттик педагогикалык университетинде Борбордук Азия университетинин Кесиптик жана үзгүлтүксүз билим берүү мектебинин өкүлдөрү менен жолугушуу өткөрүлдү.

Ага университеттин гуманитардык факультетинин деканы Нурбек Маткаримов баштаган окутуучулар жамааты катышты. Мында Кесиптик жана үзгүлтүксүз билим берүү мектебинин менеджери Самарат Мамбетажиева жана БАУнун Оштогу үзгүлтүксүз билим берүү борборунун координатору Алина Ташыбаева катышуучуларга жолугушуунун максаты, милдети жана жыйынтыгы туурасында кеңири маалыматтарды беришти.

Саамалык окутуучулардын англис тилин билүү жөндөмдүүлүктөрүн өнүктүрүү жана тиешелүү сертификацияларды алуу максатын көздөйт. Ага ылайык БАУнун Кесиптик жана үзгүлтүксүз билим берүү Мектеби менен "Cambridge Assessment English UCA" окутуу жана сертификациялоо борбору аркылуу кызматташуу тууралуу сүйлөшүүлөр жүргүзүлдү. Анын алкагында университеттин окутуучуларын ар түрдүү деңгээлдерде тил үйрөнүү курстарында окутуу жана сертификаттоо жүргүзүлөт.

Натыйжада окуу жайдын англис тили боюнча окутуучулары үчүн TKT (B2-С1) деңгээлиндеги тилди өркүндөтүү жана усулдук курсу, көп тилдүүлүк программасы менен иш алып барган окутуучулар үчүн PET (A2-B1) деңгээли, жана жаңыдан үйрөнүүнү каалаган окутуучулар үчүн KET (A1) деңгээли боюнча тил үйрөнүү курстары уюштурулат.

Ошондой эле, илим чөйрөсүндөгү окутуучулардын илимий деңгээлин чет өлкөдөн улантуу жана алардын изилдөөлөрүн эл аралык деңгээлде, SCOPUS, WEB OF SCIENCE сыяктуу маанилүү журналдарда жарыялоо максатында, ADVANCED C1 деңгээлиндеги тил курстары да пландалууда. Аталган кызматташтык университеттеги окутуучулардын заманбап билим берүү стандарттарына ылайык өздөрүнүн кесиптик квалификацияларын жогорулатуусуна, эл аралык деңгээлде таанылган сертификацияларды алууга жана англис тилинде иш жүргүзүү мүмкүнчүлүктөрүн кеңейтүүгө жол ачат.