Орообуз данга толсун: ОшМПУнун гуманитардык факультети ноорузду белгиледи

Бүгүн Ош мамлекеттик педагогикалык университетинин гуманитардык факультетинде нооруз майрамы белгиленди.

Ага ылайык аталган факультеттин социалдык иштер жана коомдук илимдер кафедрасында тайпалар аралык сынак уюштурулуп, ш-чарага университеттин ректору Бекмурза Зулуев баштаган окутуучулар жана студенттер күбө болушту. Саамалык “Нооруздун ырымы, маданияттын байлыгы” аталышында болуп, мында кафедранын таланттуу студенттеринен түзүлгөн 4 команда түрдүү номерлерди аткарып, кызуу таймаш курушту.

Жобого ылайык катышуучулар дасторкон үстүнө улуттук тамактарды жайып, улуттук кийимдер көргөзмөсүн уюштуруп, чач өрүү, кыз узатуу, баланы бешикке салуу сыяктуу кыргыздын улуттук каада-салттарынан сахналык көрүнүштөрдү аткарышты. Бул менен бирге иш-чара концерттик программа менен коштолуп, катышуучуларга жагымдуу маанай тартууланды.

Студенттердин жаратман эмгеги атайын дайындалган калыстар тобу тарабынан бааланып, натыйжада 3-орунду С-24 жана С-21 тайпалары, 2-орунду С-22 тайпасы, ал эми 1-орунду С-23 тайпасы багындырды. Ошондой эле “Мыкты үрп-адат”, “Мыкты улуттук тамак”, “Мыкты форма” номинациялары аныкталды.