ОшМПУнун ГУМАНИТАРДЫК ФАКУЛЬТЕТИНДЕ БҮТҮРҮҮ КЕЧЕСИ ӨТТҮ

Ош мамлекеттик педагогикалык университетинин гуманитардык факультетинде бүтүрүүчүлөр үчүн маданий кече уюштурулуп, студенттерге сыйлыктар тапшырылды.

Саамалык аталган факультеттин тарых, социалдык иш жана англис тили адистигин аяктап жаткан бүтүрүүчүлөргө арналып, ага окутуучулар жамааты, ата – энелер жана студенттер катышты. Иш-чараны факультет деканы Нурбек Маткаримов ачып берип, жалпы бүтүрүүчүлөрдү кызуу куттуктады.

Кеченин жүрүшүндө ар бир тайпа кураторлору менен биргеликте сахнага чыгып, куттуктоо сөздөрүн жолдошту. Аны улай бүтүрүүчү студенттер концерттик программа коюп, катышуучуларга жагымдуу маанай тартуулашты.

Бул менен бирге окууда жана коомдук, маданий, спорттук иш-чараларда ийгилик жаратып, окуу жайга сыймык алып келген студенттерге Ардак грамота, ал эми ата-энелерине ыраазычылык баракчалар тапшырылды. Ошондой эле бүтүрүүчүлөргө сөз берилип, анда алар окуу жайдагы 4 жылдык студенттик күндөрүн эскерүү менен жылуу пикирлерин билдиришти.