КЫРГЫЗ АДАБИЯТЫ ЖАНА ЧЫҢГЫЗ АЙТМАТОВ

Бүгүн Ош мамлекеттик педагогикалык университетинде “Кыргыз адабияты жана Айтматов” аталышында адабий-музыкалык кече болуп өттү.

Иш чара Чыңгыз Айтматовдун 95, Кыргыз – Россия факультетинин 20 жылдыгына жана адабият күнүнө карата уюштурулуп, ага университеттин окутуучулары жана студенттери катышты.

Мында алгач улук окутуучу Калипа Жаанбаева жана Айдың Токтосунова Айтматовдун чыгармаларында окурмандар көңүл бура турган жагдайлар жана жазуучунун диалог түзүү чеберчилиги боюнча доклад жасашты.

Андан соң таланттуу студенттер тарабынан Айтматовко арналган ырлар көркөм айтылып, обондуу ырлар ырдалып, көрүүчүлөргө жагымдуу маанай түзүлдү. Ага ылайык жазуучунун чыгармаларын камтыган видео тасма коюлуп, чыгармаларындагы каармандардын галереясы көрсөтүлдү. Ошондой эле катышуучулар “Тоолор кулаганда” романы боюнча сахналык көрүнүштөрдү аткарышты.

Белгилей кетсек, аталган иш чара КРнын Президентинин Ош облусундагы ыйгарым укуктуу өкүлүнүн буйругунун негизинде жарыяланган “Кыргыз тили жана Чыңгыз Айтматов ааламында” аттуу мамлекеттик тилдин үч айлыгынын алкагында кыргыз тили жана адабияты кафедрасы тарабынан уюштурулду.