ОшМПУда МАМЛЕКЕТТИК ТИЛ МАЙРАМЫ БЕЛГИЛЕНДИ

Бүгүн Ош мамлекеттик педагогикалык университетинде 23-сентябрь - Мамлекеттик тил күнү белгиленип, “Кыргыз тили - элибиздин дөөлөтү” аталышында адабий кече болуп өттү.

Иш чара мамлекеттик тил мыйзамынын кабыл алынгандыгынын 35 жылдыгына карата Кыргыз-Россия факультети тарабынан уюштурулуп, ага тарых илимдеринин доктору, профессор Балтагул Нурунбетов жана окуу жайдын ректору Бекмурза Зулуев баштаган профессордук окутуучулук жамаат, студенттер катышты.

Саамалык КРнын мамлекеттик гимни менен башталып, кечени университеттин ректору Бекмурза Зулуев ачып берди. Ал жалпы жамаатты тил майрамы менен кызуу куттуктап, өз сөзүндө коомчулукта адабий тилде сүйлөө муктаждыгы бар экендигин айтып, тилди урматтоо, сыйлоо, аны бузбай кийинки муунга өткөрүп берүү парз экендигин баса белгиледи.

Андан соң кыргыз тили жана адабияты адистигинин 1-курстары тарабынан эне тилди даңазалаган майрамдык салтанат тартууланды. Мында катышуучулар тарабынан Манас эпосунан үзүндү айтылып, поэзия окулуп, тилдин улуулугун, маанилүүлүгүн даңктаган сахналык көрүнүштөр көрсөтүлдү. Ошондой эле жаш таланттар обондуу ырларды жаңыртып, бий бийлешип, кыргыз улуттук кийимдер көргөзмөсүн уюштуруп, көрүүчүлөргө жагымдуу маанай жаратышты.

Эске салсак, 1989-жылы 23-сентябрда Кыргыз ССРинин Жогорку Совети “Кыргыз ССРнин мамлекеттик тили жөнүндө” Мыйзамын кабыл алган.