ОшМПУда өткөрүлгөн педагогикалык көпүрө программасынын 2-күнү

Ош мамлекеттик педагогикалык университетинде окуу жайдын 100 жылдыгына карата КМШ өлкөлөрүндөгү педагогикалык билим берүүнүн калыптанышы жана өнүгүү тарыхы боюнча иш-чара өттү.

Саамалык онлайн жана офлайн форматта өткөрүлүп, ага Казакстан, Кыргызстан, Өзбекстан, Россия жана Белоруссия өлкөлөрүндөгү жогорку окуу жайлардын көрүнүктүү педагог-илимпоздору, окумуштуулар, окутуучулар, мектеп мугалимдери жана студенттер катышты.

Ага ылайык программанын 2-күнү катышуучуларга Шадрин мамлекеттик педагогикалык университетинин профессору Элиетта Бурнашева “Бамбук принциби”, “Мугалимдин жеке жана кесиптик өнүгүү технологиясы” темасында мастер-класстарды өттү. Бул менен бирге аталган университеттин доценти Галина Сергеевна “Функционалдык сабаттуулук - жашоо үчүн үйрөнөбүз” аталышында семинар өтүп, өз тажрыйбалары менен бөлүшүп кетти. Соңунда курстан өткөн катышуучуларга атайын сертификаттар тапшырылды.

Белгилей кетсек иш-чара университеттин Эл аралык байланыштар жана инвестициялар департаменти жана Кыргыз-Россия факультети тарабынан уюштурулуп, аталган семинарлар ЖОЖдор аралык кызматташтыкты бекемдөөнүн жана тажрыйба алмашуунун маанилүү аянтчасы боло алды.