ОшМПУда 3 ФАКУЛЬТЕТКЕ ДЕКАНДЫК ШАЙЛОО ӨТКӨРҮЛДҮ

2024-жылдын 2-ноябрында Ош мамлекеттик педагогикалык университетинин 3 факультетинде декандык кызмат орун бошогондугуна байланыштуу шайлоо болуп өттү.

Шайлоо билим берүү мыйзамдарына ылайык, университеттин окумуштуулар кеңешинде түзүлгөн комиссиянын көзөмөлүндө өттү. Декандыкка талапкерлерди факультеттердин профессордук-окутуучулук жамааты бир добуштан ишеним көрсөтүп, жеңүүчүлөрдү аныктап беришти.

Натыйжада гуманитардык факультетине социология илимдеринин кандидаты Нурбек Маткаримов, табият таануу жана география факультетине биология илимдеринин кандидаты Гульмира Долонова, математика жана компьютердик-технологиялар факультетине педагогика илимдеринин кандидаты Венера Исакова декан болуп шайланышты.

Жыйынтыгында университеттин ректору Бекмурза Зулуев аталган факультеттерди буга чейин ийгиликтүү жетектеп келген география илимдеринин доктору, профессор Ашырбек Топчубаевге жана педагогика илимдеринин кандидаты Кандалат Турдубаевага ыраазычылык билдирүү менен окуу жайдын өсүп-өнүгүүсүндө үзүрлүү эмгеги бар экенин баса белгилеп, жаңы шайланган декандардын алдыдагы ишмердүүлүгүнө ийгиликтерди каалады.