ПРОФЕССОР КАРАТАЙ САРТБАЕВГЕ АРНАЛГАН ИЛИМИЙ-ПРАКТИКАЛЫК КОНФЕРЕНЦИЯ УЮШТУРУЛДУ

Бүгүн Ош мамлекеттик педагогикалык университетинде “Заманбап башталгыч билим берүү: тажрыйбалар жана келечеги” аталышында илимий-практикалык конференция болуп өттү.

Конференция профессор Каратай Сартбаевдин элесине арналып, Сартбаевдик окуулардын негизинде уюштурулуп, ага окуу жайдын ректору Бекмурза Зулуев, илимий иштер боюнча проректор Равшан Абсатаров жана Бишкек, Ош, Жалал-Абад, Баткен облустарынын ЖОЖдорунан келген окутуучулар, студенттер катышты.

Саамалыкты университеттин ректору Бекмурза Зулуев ачып, Каратай Сартбаевдин билим берүүдөгү ишмердүүлүгүнө токтолуу менен бирге жалпы катышуучуларга ийгиликтерди каалады. Ошондой эле профессордун шакирттери, жакындары, замандаштары да анын башталгыч билим берүүдөгү ийгиликтери, эмгектери тууралуу кеп козгоп, ой-пикирлери менен бөлүштү.

Иш чара пленардык жыйын менен уланып, мында адабий окуу китептери жана Каратай Сартбаев, Сартбаев атындагы илимий изилдөө лабороториясынын жүргүзгөн иштери, кыргыз педагогикасына зор салым кошкон кош жылдыз, Каратай Сартбаевдин орфографияны окутууга арналган эмгектеринин табияты боюнча илимий баяндамалар жасалды. Бул менен бирге мыкты окуган студенттерге Сартбаев атындагы стипендиялар ыйгарылды.

Пленардык жыйын аяктаган соң катышуучулар 4 секциялык ишке бөлүнүп, өз макалаларын коргошту. Конференцияга жалпысынан 70тен ашык макала келип түшкөн. Жыйынтыгында конференциянын рещолюциясы кабыл алынып, мыкты баяндамачылар уюштуруу тобу тарабынан сертификаттарга ээ болушту.

Белгилей кетсек аталган илимий конференция Сартбаевдик окууларды жайылтуу, анын эмгектерин даңазалоо максатында окуу жайдын музыкалык-педагогикалык факультетинин башталгыч, мектепке чейинки билим берүүнүн теориясы жана усулу кафедрасы тарабынан уюштурулду.