ОшМПУ Өзбекстандын Экономика жана педагогика университети менен кызматташтык келишимин түздү

Ош мамлекеттик педагогикалык университетинен түзүлгөн делегация ЖОЖдор аралык кызматташтыкты бекемдөө максатында Өзбекстандын Экономика жана педагогика университетине барды.

Окуу жайдын музыкалык-педагогикалык факультети жана дене тарбия факультетинен түзүлгөн делегацияны университет жетекчилиги жылуу кабыл алып, алгач Экономика жана педагогика университетинин материалдык – техникалык базасы менен жакындан таанышып чыгышты. Иш сапардын алкагында окутуучулар аталган окуу жайдын тиешелүү адистиктерине мобилдүүлүк программасынын алкагында даярдалган атайын конок – лекцияларды өтүп беришти.

Мындан сырткары заманбап билим жана тажрыйба алмашуу процессин мындан ары өнүктүрүү максатында факультет жетекчилери өз ара кызматташуу меморандумдарына кол коюшту. Бул келишимдер илимий-педагогикалык тажрыйба алмашууну, заманбап технологиялардын негизинде окуу процессин мындан ары өркүндөтүүнү, профессорлордун, окутуучулардын жана студенттердин ортосундагы инновациялык кызматташтыкты чыңдоо максатын көздөйт.

Ошондой эле биргелешкен илимий долбоорлорду жана профессорлор, окутуучулар жана студенттер үчүн семинар-тренингдерди уюштурууга, мобилдүүлүк боюнча кызматташууну кеңейтүүгө зор мүмкүнчүлүк берет. Аталган демилге келечек муундун терең билимин камсыз кылуу, алардын илимий потенциалын жогорулатуу жана билим берүү процессин эл аралык стандарттарга шайкеш келтирүү багытында маанилүү кадам болуп саналат.