ОшМПУ Наманган мамлекеттик университети менен кызматташат

Бүгүн Ош мамлекеттик педагогикалык университетинде Өзбекстандын Наманган мамлекеттик университетинен келген делегация конок болду.

Мында коноктор Наманган мамлекеттик университетинин педагогика факультетинин деканы, п.и.к., доцент Илхомжон Рахимов баштаган педагогика, психология, музыка жана дене тарбия адистиктеринин кафедра башчылары алгач окуу жайдын ректору Бекмурза Зулуевдин кабыл алуусунда болушту.

Жолугушууда делегация өздөрүнүн университети тууралуу чакан маалымат беришип, окуу жайга келүү максатын айтышты. Мында тараптар ортосунда 2х2 программасы, академиялык мобилдүүлүк, мугалимдердин тажрыйба алмашуусу, ЖОЖдор аралык илимий изилдөө иштерин жүргүзүү, биргелешкен конок-лекцияларды уюштуруу сыяктуу бир топ кызматташтыктар туурасында сүйлөшүүлөр жүрдү.

Баарлашуудан соң жетекчилер эки тараптуу макулдашуунун жыйынтыгы менен кызматташуу меморандумуна кол коюшту. Андан соң коноктор университеттин музыкалык-педагогикалык факультетинин жамааты менен жакындан таанышып, окуу жайга саякат курушту.