ОшМПУ таланттары окуу жайдын 100 жылдыгына карата отчёттук концерт койду

Бүгүн Ош мамлекеттик педагогикалык университетинин музыкалык-педагогикалык факультетинде жыл жыйынтыктоочу отчёттук концерт коюлду.

Иш-чарага университеттин ректору Бекмурза Зулуев баштаган профессордук-окутуучулук жамаат жана студенттер күбө болушту. Саамалык окуу жайдын 100 жылдыгына карата музыкалык билим берүү жана аны окутуунун усулу кафедрасы тарабынан уюштурулуп, мында аталган кафедранын студенттери жана окутуучулары өздөрүнүн чыгармачылыгын тартуулашты.

Салтанаттын жүрүшүндө факультеттин окутуучуларынан жана студенттеринен түзүлгөн “Кербен” фольклордук тобу жогорку деңгээлдеги программа коюп, элдик ырлар, дастандар жана түрдүү обондор созулду. Кыргыз күүлөрү жана салттуу ырлар жаңырган бул концертти көрүүчүлөр чоң кызыгуу менен кабыл алышты. Мындан сырткары хор жамааты, вокалдык жана инструменталдык багыттагы аткаруучулар сахнада өз өнөрлөрүн көрсөтүп, иш-чарага өзгөчө көрк беришти.