19 март 2024
195
КОЛЛЕДЖДЕ НООРУЗ МАЙРАМЫНА КАРАТА ИШ ЧАРА ӨТТҮ
КОЛЛЕДЖДЕ НООРУЗ МАЙРАМЫНА КАРАТА ИШ ЧАРА ӨТТҮ
Бүгүн Ош мамлекеттик педагогикалык университетинин колледжинде Нооруз майрамын утурлай саамалык уюштурулуп, концерттик программа тартууланды.
Иш чара “Кош келипсиң санжыралуу Ноорузум!” аталышында болуп, ал колледжин дене тарбия жана табигый илимдер кафедрасы тарабынан уюштурулду. Майрамдык кечени университеттин окуу иштери боюнча проректору Каныбек Раимбеков ачып берип, мында аталган кафедранын студенттеринин чыгармачылыгына колледждин деканы Токторбай Кырбашев баштаган окутуучулар жамааты жана студенттер күбө болушту.
Майрамдык салтанат кыргыз элинин каада-салттары, үрп-адаттары боюнча даярдалган көрүнүштөр, ыр, бийлер менен коштолуп, студенттер Нооруз майрамынын жаралуу тарыхын баяндашып, анын бүгүнкү күндө кандай майрамдалаарын көрсөтүштү. Ошондой эле тушоо кесүү, кол күрөш, топ таш, аркан тартыш сыяктуу улуттук оюндар аткарылып, дасторкон үстүнө улуттук даамдар жайылды.
Студенттердин чыгармачылык жөндөмүн арттыруу, жаштарга улуттук салттарды таанытуу, каада-салттардын баалуулугун үйрөтүү максатында уюштурулган иш чарада катышуучулардын таланттары жана өзгөчө даярдыгы бааланып, саамалык жогорку маанайда жыйынтыкталды. Соңунда активдүү катышкан студенттерге дипломдор тапшырылып, ыраазычылыктар айтылды.




