КОЛЛЕДЖДЕ МАМЛЕКЕТТИК ТИЛ КҮНҮНӨ АРНАЛГАН ДЕКАДА ЖЫЙЫНТЫКТАЛДЫ

Бүгүн Ош мамлекеттик педагогикалык университетинин колледжинде Мамлекеттик тилдин 35 жылдыгына карата уюштурулган 10 күндүк декада жыйынтыкталып, адабий-музыкалык кече өткөрүлдү.

Иш чара “Эне тили болбосо, аты аталбайт улуттун” аталышында болуп, ага колледждин башчысы Токторбай Кырбашев баштаган окутуучулук жамаат жана студенттер катышты. Мында таланттуу студенттер тарабынан концерттик программа коюлуп, кыргыз тилин даңазалаган көркөм окуу, ыр, бий, сахналык көрүнүштөр аткарылып, көрүүчүлөргө майрамдык маанай тартууланды.

Белгилей кетсек буга чейин колледжде Мамлекеттик тил күнүнө арналган 10 күндүк декада жарыяланып, анын алкагында ачык тарбиялык сааттар өткөрүлүп, ыр, дил баян жазуу сынактары уюштурулуп, тегерек стол, дискуссиялар өткөрүлүп, тилчи-окумуштуулардын эмгеги тууралуу көргөзмөлөр көрсөтүлгөн. Аталган сынактардын жеңүүчүлөрү бул кечеде диплом жана баалуу белектер менен сыйланышты.

Саамалык “Кыргыз Республикасынын мамлекеттик тили жөнүндө” Кыргыз Республикасынын Мыйзамынын кабыл алынгандыгынын 35 жылдыгына, Кара-Кыргыз автономиялуу облусунун түзүлгөндүгүнүн 100 жылдыгына карата мамлекеттик тилдин үч айлыгын жарыялоо максатында КРнын Билим берүү жана илим министрлигинин 2024-жылдын 10-сентябрындагы №140/1 Буйругунун негизинде уюштурулду.