СТУДЕНТТЕР “SPELLING BEE” СЫНАГЫНДА

Ош мамлекеттик педагогикалык университетинин колледжинде окуу жайдын 100 жылдыгына карата студенттерге арналган “Spelling Bee” сынагы өткөрүлдү.

Саамалык дүйнөлүк тилдер кафедрасындагы чет тил адистигинин 2-курстун студенттери арасында өтүп, ага аталган кафедранын окутуучулары жана студенттер күбө болушту. Сынак үч баскычтан туруп, анын алгачкы бөлүгүндө катышуучулар англис тилиндеги “Akeelah and the Bee” (Акылай жана аарылар) тасмасын көрүштү. Андан соң студенттер конкурска даярданып, сынактын тамгалап айтуу туру боюнча машыгышты.

Ал эми экинчи бөлүгүндө 30 студент ат салышып, мында алардын тапкычтыгы, ой жүгүртүүсү жана сөздөрдү туура айтуудагы чеберчилиги текшерилди. Жыйынтыгында эң мыкты деп табылган жеңүүчү студенттерге акчалай сыйлыктар тапшырылды.

Белгилей кетсек иш чара студенттердин англис тилиндеги сөз байлыгын арттыруу, сөздөрдү туура жазуу жөндөмүн өнүктүрүү жана тил үйрөнүүгө болгон кызыгуусун жогорулатуу максатында колледждин дүйнөлүк тилдер кафедрасы тарабынан уюштурулган. Уюштуруучулар бул саамалыкты салтка айлантып, жыл сайын өткөрүү максатын көздөшүүдө.