ОшМПУнун КОЛЛЕДЖИНДЕ АТА-ЭНЕЛЕР МЕНЕН ЖОЛУГУШУУ ӨТКӨРҮЛДҮ

Бүгүн Ош мамлекеттик педагогикалык университетинин колледжинде мектепке чейинки педагогика жана жекече усулдар кафедрасы тарабынан ата-энелер чогулушу өткөрүлдү.

Саамалык "Өнүгүүгө өбөлгө болгон ата-эне " деген теманын алкагында уюштурулуп, ага мектепке чейинки даярдоо адистигинде билим алып жаткан бардык студенттердин ата-энелери катышты.

Иш чараны колледждин деканы Токторбай Кырбашев ачып берип, ал өз сөзүндө бүгүнкү күндөгү тарбиялоо жана билим берүү процессиндеги көйгөйлүү маселелерге кенен токтолду. Ошол эле учурда ата-энелердин суроолоруна жооп берип, кызуу талкуу жүргүзүлүп, аталган кафедрага тиешелүү маалыматтар менен кенен бөлүшүп өттү.

Андан соң окуу жайдын аялдар кеңешинин төрайымы Гулчехра Токтосунова, колледждин тарбия иштери боюнча декандын орун басары Өмүрбек Асилбек уулу сөзгө чыгышты. Мында алар ата-энелерге мектепке чейинки билим берүү адистигинде жалаң кыздар окугандыгына байланыштуу учурда коомдо жүрүп жаткан ар кандай терс көрүнүштөрдөн алыс болууга жана студенттерди чогу биргеликте көзөмөлгө алууга чакырып, өз сунуш-пикирлерин айтышты.

Бул менен бирге чогулуштун модератору, кафедра башчы Меринса Нышанбаева катышуучуларга ар бир тайпа жөнүндө маалымат берип, окуу программасы, университеттин миссиясы менен тааныштырды. Иш чаранын соңунда таланттуу студенттер тарабынан даярдалган чакан концерттик программа тартууланды.

Жыйынтыгында ата-энелер өз ыраазычылыктарын айтышып, саамалык жылуу пикирлер менен аяктады. Жалпы жыйындан соң катышуучулар тиешелүү кааналарга бөлүнүп, ар бир куратор тайпадагы студенттер туурасында ата-энелерине маалымат беришти.  

Белгилей кетсек бул сыяктуу жолугушуулар мектепке чейинки билим берүү адистигинин билим берүү сапатын жогорулатуу, студенттердин тартибин көзөмөлгө алуу менен татыктуу кесип ээлерин даярдоону камсыздоо максатында колледжде жыл сайын уюштурулуп келет.