ОшМПУ: Колледжде Ноорузга карата кафедралар аралык сынак өткөрүлдү

Ош мамлекеттик педагогикалык университетинин колледжинде “Эне тил – улуттун уңгусу, көөнөрбөс мурасы” аталышында кафедралар аралык кароо сынак өттү.

Иш-чара 21-март берекелүү Нооруз майрамына карата уюштурулуп, ага окуу жайдын ректору Бекмурза Зулуев, университеттин окуу иштери боюнча проректору Каныбек Раимбеков, колледждин деканы Токторбай Кырбашев баштаган профессордук-окутуучулук жамаат жана студенттер күбө болушту.

Саамалык кыргыз элинин каада-салтын, үрп-адатын, наркын жана эне тилин даңазалоо максатында мамлекеттик тил кафедрасы тарабынан уюштурулду. Мелдешке колледждин 6 кафедрасы катышып, мында алар өз таланттарын тартуулоо менен командаларынын намысын коргошту.

Сынак 2 этаптан туруп, алгачкы тур “Мамлекеттик тилде окуткан мыкты окутуучу – 2025” аталышында болгон. Ага ылайык буга чейин ар бир кафедрадан бирден окутуучу сабак өтүп, анда уюштуруу тобунан түзүлгөн комиссия сабактарга катышуу менен өз баасын берген.

Ал эми бүгүн сынактын негизги бөлүгү окуу жайдын спорттук аянтчасында өткөрүлдү. Мында катышуучу кафедралардын жамааты улуттук оюндарды жана куда түшүү, кыз узатуу, келин алуу, баланы бешике салуу, тушоо кесүү сыяктуу кыргыздын улуттук каада-салттарын көрсөтүп беришти. Бул менен бирге катышуучулар Ата-Журт, эне тил темаларында көркөм айтып, элдик ырлардан обон созуп, майрамдык маанай жаратышты.

Жыйынтыгында калыстар тобунун чечими менен 3-орунду информатика жана математика кафедрасы, 2-орунду мектепке чейинки педагогика жана жекече усулдар кафедрасы, ал эми 1-орунду башталгыч класстын педагогикасы жана усулу кафедрасы багындырды. Жеңүүчүлөргө уюштуруу тобу тарабынан жана профсоюз комитети тарабынан баалуу белектер, акчалай сыйлыктар жана ыраазычылык баракчалар тапшырылды.

Белгилей кетсек аталган иш-чара окуу жайдын 100 жылдыгына карата жана КР Президентинин “Улуттук нарк” жөнүндөгү 2022-жылдын 20-майындагы №157 жарлыгынын негизинде кабыл алынган 2022-2027-жылдарга “Улуттук наркты сактоо жана өнүктүрүү” жөнүндөгү улуттук программасынын алкагында уюштурулган.