Поэзия кечеси: Акын Улукбек Омокеев ОшМПУда

Бүгүн Ош мамлекеттик педагогикалык университетинин колледжинде поэзия кечеси уюштурулуп, конокто акын Улукбек Омокеев болду.

Иш-чара окуу жайдын 100 жылдыгына карата жана КР Президентинин “Улуттук дем – дүйнөлүк бийиктик” уңгужолу жарлыгынын алкагында өткөрүлүп, ага колледждин башчысы Токторбай Кырбашев баштаган окутуучулар жана студенттер күбө болушту.

“Жалпыңды чакырдык ыр ук деп, жаштыгын кайрысын Улукбек” аталышындагы бул саамалык акындын лирикалык дүйнөсүнө сүңгүп кирип, поэзияга суусаган угармандарга руханий ырахат тартуулады. Мында Улукбек Омокеевдин ырлары студенттер тарабынан көркөм айтылып, обондуу ырлары жаңырды.

Ошондой эле кеченин жүрүшүндө акын өзү да ырларын угармандарга тартуулап, жаштардын суроолоруна таамай жооп берип, катышуучуларга чыгармачылыгы тууралуу ой бөлүштү. Жыйынтыгында акынга уюштуруучулар тарабынан белектер тапшырылып, иш-чара жылуу пикирлер менен соңуна чыкты.

Белгилей кетсек аталган адабий кече жаштар арасында поэзияга болгон кызыгууну арттыруу, улуттук адабиятты даңазалоо жана акындар менен баарлашуу аркылуу студенттердин жан дүйнөсүн байытуу максатында колледждин мамлекеттик тил кафедрасы тарабынан уюштурулду.

Маалымат иретинде, Улукбек Омокеев 1988-жылы Ош облусунун Кара-Кулжа районуна караштуу Чалма айылында төрөлгөн. “Жаз жыты”, “Кеч күздөгү сулуулар” “Ата-сүйүү” сыяктуу ыр жыйнактарынын автору. Алыкул Осмонов жана Эгемберди Эрматов атындагы адабий сыйлыктардын лауреаты ж.б сыйлыктардын ээси жана “Жигер” чыгармачыл жаштар борборунун негиздөөчүсү.