ОшМПУга КОКОН МАМЛЕКЕТТИК ПЕДАГОГИКАЛЫК ИНСТИТУТУНУН ДЕЛЕГАЦИЯСЫ КЕЛДИ

Бүгүн Ош мамлекеттик педагогикалык университетинде Кокон шаарындагы Кокон мамлекеттик педагогикалык институтунан түзүлгөн делегация конок болушту.

Конокто Өзбекстан республикасынын Фергана областындагы Кокон шаарынын Кокон мамлекеттик педагогикалык институтунун табият таануу факультетинен түзүлгөн 24 адамдан турган окутуучулар жана студенттер болду.

Мында география кафедрасынын башчысы Лутфулло Абдуназаров, декандын орун басары Бахтиержон Нумонов, биология илиминин доктору Зомиржон Исомиддинов жана география илиминин доктору Одилжон Тобиров баштаган өкүлдөр университеттин материалдык – техникалык базасы менен таанышып, окуу жайга саякат курушту.

Жолугушуу эки тараптын алакасын арттырып, билим берүүдө бир топ натыйжалуу иштерди биргеликте жүзөгө ашыруу максатында уюштурулуп, алгач коноктор алдын ала түзүлгөн макулдашуунун негизинде окуу жайдын табият таануу жана география факультетинин ишмердүүлүгү менен жакындан таанышып чыгышты.

Бул менен бирге факультеттин окутуучулары менен студенттери жолугушуп, өз ара бири- бирине сабак өтүү менен тажрыйба алмашты. Жолугушуунун натыйжасында студенттердин талаа практикаларын чогуу уюштуруу маселеси талкууланып, аталган эки окуу жай тиешелүү факультеттер ортосунда илимий – практикалык кызматташтыкты бекемдөө максатында өз ара келишимдер түзүлдү.

Белгилей кетсек, окуу жай Өзбекстан Республикасынын жогорку окуу жайлары менен илим жана билим берүү жаатында, анын ичинде педагогикалык багытта активдүү кызматташып келет.