ОшМПУда информатика жана математика адистиктеринин 20 жылдыгы белгиленди

Ош мамлекеттик педагогикалык университетинде информатика жана математика адистиктеринин түзүлгөндүгүнүн 20 жылдыгына карата салтанаттуу иш-чара болуп өттү.

Окуу жайдын 100 жылдыгы менен катарлаш келген бул саамалыкка университеттин ректору Бекмурза Зулуев, факультет деканы Венера Исакова, кафедра башчылары, ардагер мугалимдер, жана атайын чакырылган коноктор катышты. Катарда бүгүнкү күндө мектеп жетекчиси болуп иштеп жаткан факультеттин сыймыктуу бүтүрүүчүлөрү да болду.

Мында ардагерлерден баштап, бүгүнкү күндө мугалимдикти аркалап жаткан жаш адистерге чейин сөз сүйлөп, адистиктердин калыптаныш тарыхы жана жетишкендиктери тууралуу ойлор айтылды. Ошондой эле, факультет жана университет тууралуу видеопрезентациялар көрсөтүлдү.

Ал эми илимий-практикалык секцияда бүтүрүүчүлөр заманбап билим берүүдөгү информатика жана математика адистигинин ролу тууралуу баяндама жасап, жаңы технологиялар менен тааныштырды. Робототехника жана жасалма интеллект жаатында факультеттин окутуучусу Айсырга Ырысбаева, онлайн платформалар боюнча Айнура Орозбаевалар өз тажрыйбаларын бөлүшүштү. Ошондой эле бүтүрүүчү Аселкан Эргешбай кызы “Заманбап билим берүүдө математика жана информатика адистиктеринин орду” темасында слайд-презентация сунуштады.

Иш-чара математика жана информатика адистиктеринин өнүгүү тарыхын даңазалап, билим берүү тармагындагы кызматташтыкты бекемдеген маанилүү аянтча болду.