КИТЕП - БИЛИМ АЛУУНУН БАШКЫ КУРАЛЫ

14-февраль Китеп белекке берүү күнүнө карата Ош мамлекеттик педагогикалык университетинин колледжинде акыл таймаш болуп өттү.

Иш чара студенттердин билим деңгээлин өстүрүү жана китеп окуу маданиятын жандандыруу максатында колледждин жаштар комитети тарабынан уюштурулуп, ага студенттерден куралган 10 команда катышты.

Мында катышуучулар түрдүү категориялардагы тапшырмаларды аткаруу менен өз билимдерин сынашып , логикалык ой жүгүртүүнү жогорулаткан предметтик суроолорго жооп беришти. Жыйынтыгында уюштуруу тобу жеңүүчү командаларга диплом жана китептерди белекке тапшырды.

Белгилей кетсек 14-февраль - Эл аралык китеп тартуулоо күнү. Китеп сүйүүчүлөрдүн күнүнө айланган бул майрам 2012-жылдын ушул күнүнөн тарта белгиленип келет. Майрамды белгилөө демилгеси АКШдагы балдар китептеринин сайтынын негиздөөчүсү Эмми Бродмур аттуу айымга таандык. Анын уулдарынын бири ага эмне үчүн адамдар бири-бирине китеп белек кыла турган майрам жок деп сураганда, апасы бул идеяны көтөрүп чыгып, коомчулукка сунуштап, дүйнө эли аны колдогон.