ОшМПУнун СТУДЕНТТЕРИ ӨЗБЕКСТАНДА ӨТҮП ЖАТКАН ДҮЙНӨЛҮК МЕЛДЕШКЕ ИЙГИЛИКТҮҮ КАТЫШУУДА

Өзбекстан Республикасынын Ташкент шаарында кикбоксинг боюнча “Дүйнө кубогу-2024” Эл аралык турнири өтүп жатат.

Мында дүйнөнүн 45 өлкөсүнөн келген спортчулар мелдеш куруп, катарда Ош мамлекеттик педагогикалык университетинин студенттери да бокс, кикбоксинг боюнча спорт чебери, тренер Махаматсадык Эркинбаевдин жетекчилиги менен ийгиликтүү катышып, учурда финалдык баскычтарга көтөрүлүшүүдө.

Атап айтсак, дене тарбия факультетинин дт-24-2 тайпасынын студенти Кутман Максатбеков 60 кг салмакта эки атааңдашын утуп, финалдык баскычка өттү. Ал эми дт-23-2 тайпасынын студенти Актилек Осмонжанов 67 кг салмакта эки атааңдашын жеңип, жарым финалга чыкты.

Ошондой эле дт3-22 тайпасынын студенттери Үсөн Абдывахапов 57 кг салмакта кикбоксинг К-1 стилинде Ирак жана Өзбекстандык атааңдаштарын жеңип, жарым финалга чыкты. Дал ушул сыяктуу кикбоксингдин лоу-кик стилинде Асан Абдывахапов 57 кг салмак боюнча Алгериялык жана Өзбекстандык атааңдаштарын утуп, жарым финалдык баскычка жол алды. Аталган турнир алдыда дагы да уланмакчы.