ОшМПУда 1-июнь – Эл аралык балдарды коргоо күнү белгиленди

1-июнь – Эл аралык балдарды коргоо күнү бүгүн Ош мамлекеттик педагогикалык университетинде шаңдуу белгиленип, маданий-оюн-зоок программасы уюштурулду.

Иш-чарага университеттин окутуучуларынын жана кызматкерлеринин балдары катышып, майрамдык маанайда өткөрүлгөн саамалыкка күбө болушту. Салтанатты окуу жайдын ректору Бекмурза Зулуев ачып берип, бөбөктөрдү майрамы менен кызуу куттуктады. Ректор өз сөзүндө балдардын коопсуздугун, билим алуусун жана бактылуу балалыгын камсыздоо коомчулуктун жалпы жоопкерчилиги экенин белгилеп өттү.

Майрамдык программанын жүрүшүндө балдар окуу жайдын аянтында сүрөт тартышып, ар кандай оюн-зоокторго катышып, таттууларга жана белектерге ээ болушту. Ошондой эле жомок каармандары жаш жеткинчектердин көңүлүн көтөрүп, алар менен биргеликте бийлешип, салтанат балдардын маанайын көтөрө турган концерттик программа менен коштолду.

Белгилей кетсек, иш-чара университеттин жетекчилиги жана Профсоюз комитети тарабынан уюштурулду.