СТУДЕНТТЕР ЭНКАУНТЕР ИНТЕЛЛЕКТУАЛДЫК ТАЙМАШЫНДА

Бүгүн Ош мамлекеттик педагогикалык университетинде факультеттер аралык Энкаунтер (Encounter) интеллектуалдык оюну өткөрүлдү.

Иш чарага ар бир факультеттин 1-курстарынан тандалып алынган шамдагай, ыкчам, тапкыч, интеллекти жогору студенттер катышты. Мында жобого ылайык 5 адамдан турган 6 команда кызуу оюн курушту.

Оюндун жүрүшү окуу жайдын спорттук аянтчасында уюштурулуп, алгач адистер оюндун шарты боюнча жалпы катышуучуларга түшүнүк беришти. Аталган интеллектуалдык оюндун шартына ылайык уюштуруучулар тарабынан окуу жайдын ар кайсы жерине код жашырылган. Ал эми командаларга код жашырылган жай туурасында суроо берилгенде, жообун тапкандар ошол жайга барып, жашырылган кодун табууга тийиш. Жыйынтыгында жеңүүчүлөр аныкталып, аларга уюштуруу тобу тарабынан диплом жана акчалай сыйлыктар тапшырылды.

Белгилей кетсек саамалык Кыргыз Республикасынын Маданият, маалымат, спорт жана жаштар саясаты министрлиги, Кыргыз Республикасынын Министрлер Кабинетинин 2021-жылдын 9-декабрындагы № 322-т тескемеси менен бекитилген 2021-2025-жылдарга иш-чаралар планын ишке ашыруунун биринчи этабы катары 2020-2030-жылдарга жаштар саясатынын концепциясынын алкагында 1-декабрь Бүткүл дүйнөлүк СПИДке каршы күрөшүү күнүнө карата окуу жайдын жаштар комитети тарабынан уюштурулду.