Китепкөй жаштар – келечек лидерлери: ОшМПУда дебаттык турнир өттү

Ош мамлекеттик педагогикалык университетинде “Китепкөй жаштар – келечек лидерлери” аттуу ЖОЖдор ортосунда дебаттык турнир өткөрүлдү.

Жогорку окуу жайлар аралык бул иш-чара жаштардын китеп окуу маданиятын өнүктүрүү, өз ара ынтымакты бекемдөө жана жарандык позициясын билдирүү жөндөмүн жогорулатуу максатын көздөп, ага 20дан ашык команда катышты. Британия жана Америка парламенттик форматында өткөрүлгөн үч баскычтуу турнирде жалпы тогуз резолюция талкууланып, натыйжада мыкты командалар аныкталды.

Жыйынтыгында: 1-орунду “Оld’ы” командасы, 2-орунду “Самрук” командасы, ал эми 3-орунду “Лидер” командасы ээледи. Ошондой эле “Мыкты оратор”, “Мыкты оппозиция башчысы”, “Мыкты өкмөт башчысы” номинациялары тапшырылып, жеңүүчүлөр кубок, Ардак грамота жана кызыктыруучу белектер менен сыйланышты.

Белгилей кетсек аталган саамалык КР Президентинин №369 кабыл алынган “Улуттук дем – дүйнөлүк бийиктик” уңгужолу жарлыгынын алкагында окуу жайдын 100 жылдык мааракесине арналып, ошондой эле 23-апрель – Бүткүл дүйнөлүк китеп жана автордук укук күнүнө карата окуу жайдын жаштар комитети тарабынан уюштурулду.