СТУДЕНТТЕРДИН СТАРТАП ДОЛБООРЛОРУ ТАНДАЛДЫ

Бүгүн Ош мамлекеттик педагогикалык университетинин Бизнес идеяларды ишке ашыруу борборунда студенттер өз долбоорлорун жактап беришти.

Борборго жалпы 20 дан ашуун бизнес-долбоорлор келип түшүп, алардын ичинен бешөө тандалып алынды. Аларга “Stud food”, “Саякат Ош”, “РезинАрт”, “Кофейня Лондон”, “Күтүү залы” сыяктуу студенттик долбоорлор кирет.

Студенттер өз долбоорун комиссия алдында коргошуп, аны ишке ашыруу жолдорун айтып, жалпы маалымат беришти. Ага окуу жайдын илимий техникалык кеңешинин мүчөлөрү Равшан Абсатаров, Рысбек Абылов, Эралы Арынбаев, Нурила Сагынбай кызы жана Эркин Касымбековдор катышып, жалпы долбоорлорго башынан күбө болушуп, кошумча ой-пикирлерин билдиришти.

Бизнес-проекттер комиссия мүчөлөрү тарабынан талкууга алынып, жыйынтыгында 4 долбоорду кабыл алышты. Аларды ишке ашыруу үчүн керектүү акча каражаттар жана материалдар окуу жай тарабынан камсыздала турганын белгилешти.