ОКУТУУЧУЛАР БИЛИМ БЕРҮҮНҮН САПАТЫН КАМСЫЗДООНУН ЖАҢЫ УСУЛДАРЫН ҮЙРӨНҮШТҮ

Ош мамлекеттик педагогикалык университетинде кезектеги семинар уюштурулуп, ал "Билим берүүнүн сапатын камсыз кылууда окутуунун натыйжаларынын ролу" деген темада болуп өттү.

Тренингди EdNet Билим берүүнүн сапатын камсыздоо агенттигинин эксперти Нурлан Өмүров өтүп, ага шаардагы мектептердин мугалимдери жана университеттин окутуучулар жамааты жигердүү катышты.

Семинар 3 баскычтан туруп, мында окутуунун натыйжалары жана компотенциялары, баалоонун түрлөрү, жогорку билим берүү системасынын иш жүргүзүү, даярдоо деңгээли, ишмердүүлүктүн багыттары жөнүндө кенен түшүнүктөр айтылды. Бул менен бирге катышуучулар топторго бөлүнүп, түрдүү практикалык тапшырмалар аткарышты.

“Мен үчүн бүгүнкү семинар абдан кызыктуу болду. Анткени семинарга катышкан окутуучулар коллективи жаңы маалыматтарга абдан кызыкдар жана мотивациясы зор экенин байкадым. Окутуунун натыйжасы бул билим берүүнүн сапаты менен тыгыз айкалышкан. Ошондуктан бүгүн окутуунун жаңы усулдары боюнча интерактивдүү методикалык семинарды өттүк.”-, деп билдирди Нурлан Өмүров.

Ал эми катышуучулар 21-кылым үчүн окуу натыйжалары жана көндүмдөрү, ОНго жетүү үчүн окутуунун, баалоонун кандай ыкмаларын колдонуу керектиги жөнүндө толук маалыматтарды алышты. Семинар 09:00дөн 17:00гө чейин уланып, бардык катышуучуларга сертификаттар тапшырылды.

Белгилей кетсек иш чара ОшМПУнун Окуу бөлүмү тарабынан уюштурулган.