ОКУТУУЧУЛАР МАМЛЕКЕТТИК ТИЛДИ ОКУТУУНУН ЖАҢЫ ЫКМАЛАРЫН ҮЙРӨНҮШТҮ

16-17-февраль күндөрү Ош мамлекеттик педагогикалык университетинин Кыргыз-Россия факультеттинде “ЖОЖдордо кыргыз тилин деңгээлдер боюнча окутуу” деген аталышта семинар болуп өттү. Бул тууралуу кыргыз тили жана адабияты кафедрасынын башчысы Жаннат Джумаева билдирди.

Маалыматка ылайык аталган семинарды И.Арабаев атындагы Кыргыз мамлекеттик университетинин окутуучулары ЖОЖдордо мамлекеттик тилди деңгээлдер боюнча окутуу адиси п.и.к.,доцент Назгүл Сегизбаева, п.и.к. доцент Назгүл Абдраевалар өтүшкөн. Эки күндүк семинар - тренингдин жүрүшүндө мамлекеттик тилди колдонуунун деңгээлдери жана аны окутуунун маселелери талкууланып, окутуучулар практика жүзүндө деңгээлдер боюнча машыгышты жана студенттердин тил билүү деңгээлин аныктоо жолдору үйрөнүштү.

Иш чаранын жыйынтыктоо бөлүгүнө ОшМПУнун Окуу иштери боюнча проректору, профессор Каныбек Раимбеков катышып, келген конокторго жамааттын атынан ыраазычылык билдирүү менен аларга окуу жайдын алкыш баракчасын жана атайын белектерин тапшырды. Ошондой эле семинардын жалпы угуучуларына уюштуруу тобу тарабынан сертификат ыйгарылды.

Белгилей кетсек семинар кыргыз тили жана адабияты кафедрасынын демилгеси менен уюштурулуп, ага Колледждин, Кыргыз-Россия жана Музыкалык-педагогикалык факультеттеринин окутуучулары катышты.