ЖАШ СТАРТАПЕРЛЕР БИЗНЕС ТУУРАЛУУ САБАК АЛЫШАТ

Бүгүн Ош мамлекеттик педагогикалык университетинин Бизнес идеяларды ишке ашыруу борборунда студенттер жана магистранттар үчүн комплекстүү алты күндүк бизнес окуу старт алды.

Иш чара Американын эл аралык өнүктүрүү агенттиги (USAID), Ага Хан фонду жана окуу жайдын Бизнес инкубатору менен биргеликте уюштурулууда. Ал “Жергиликтүү өнүктүрүү” долбоорунун алкагында жаштардын арасында ишкердүүлүктү өнүктүрүү программасынын негизинде өткөрүлүп жатат.

Аталган окуу курска студенттердин сурамжылоосунан соң, жалпы 100дөн ашык өтүнмө кат келип түшкөн. Анын ичинен 30 студент тандалып алынып, жетекчилик тарабынан сабактардан бошотулуп, бизнес тренингге катышууда.

Мында жаш стартаперлер бизнести жана анын бардык этаптарын окуп, үйрөнүшөт. Алгачкы сабак киришүү менен башталып, студенттер команда менен иштөө, жеке ишкердиктин оң жана терс жактары жана канвас бизнес модели жөнүндө кеңири түшүнүк алышты.

Белгилей кетсек, окутуунун соңку күнү атайын бизнес идеялардын сынагы уюштурулуп, комиссия тобу тарабынан эң мыкты деп эсептелген 2 долбоорго 2000 $ дан 4000 $ суммасында кайтарымсыз грант берилмекчи.