18 апрель 2023
239
СТУДЕНТТЕР ЧЕЧЕН АЙТЫШ СЫНАГЫНДА
СТУДЕНТТЕР ЧЕЧЕН АЙТЫШ СЫНАГЫНДА
Бүгүн Ош мамлекеттик педагогикалык университетинде студенттердин “Чечен айтыш” сынагы өткөрүлдү.
Иш чара кыргыз тилиндеги көркөм сөз каражаттарын жайылтуу, кеменгер кептер, макал-лакаптар менен тааныштыруу максатында уюштурулуп, ага окуу жайдын жетекчилиги, окутуучулар жана студенттер күбө болушту.
Сынакты алгач окуу жайдын ректору Бекмурза Зулуев ачып, өз сөзүндө билимдүүлөр гана дүйнөнү башкарып, ийгилик тепкичтеринде баса аларын белгилеп, катышуучуларга ийгилик каалоо менен, университеттин билимдүү жаштарына ар дайым колдоо көрсөтөөрүн айтып өттү.
Сынакка ар бир факультеттен бирден студент катышып, жобого ылайык “Сөз табуу”, “Ой топтоо”, “Кеп куржун” жана “Сабаттуу бол” аттуу төрт этаптын негизинде күч сынашты. Мында студенттер кеп казынасын өстүрүүгө, сөз кадырын билүүгө, адабий тилдин нормаларын сактоого багытталган тапшырмаларды аткарышты.
Жыйынтыгында калыстардын чечими менен 3-орунду Табият таануу жана география факультетинин студенти Мухаммедтаир Шамырбеков ээлесе, 2-орунга Гуманитардык факультетинин студенти Рустам Абилов ээ болуп, ал эми 1-орунду Кыргыз-Россия факультетинин студенти Айданек Сагынбек кызы багындырды.