ОшМПУда ИЛИМИЙ-ПРАКТИКАЛЫК КОНФЕРЕНЦИЯ ӨТТҮ

Бүгүн Ош мамлекеттик педагогикалык университетинде "Билим берүү тармагындагы жаңылануулар шартында болочок башталгыч класс мугалимдерин кесипке даярдоо" аттуу илимий-практикалык конференция өткөрүлдү.

Иш чара университеттин чоң жыйындар залында өтүп, ага Жалал-Абад, Баткен, Бишкек шаары жана Ош облусундагы ЖОЖдордун, колледждердин окутуучулары, студенттер, магистранттар, аспиранттар жана жаш окумуштуулар катышты. Конференция педагогикалык билим берүүнү өнүктүрүү жаатында тажрыйба алмашуу жана башталгыч класстардын мугалимдерин кесипке даярдоо программаларын жакшыртуу максатында уюштурулду.

Форум алгач университеттердин жана колледждердин көргөзмөсү менен башталып, андан соң илимий-практикалык конференциянын ачылыш аземи менен уланды. Ага ылайык "Окуу керемет" долбоорунун ишмердүүлүгү жөнүндө презентациялар коюлуп, жаңы ченемдик документтерди талкуулоо сунушталды. Андан соң келген коноктор өз баяндамаларын жасап, катышуучулар секциялык иштерге бөлүндү. Ошондой эле жалпы пленардык отурумда белгиленген маселелер талкуулана турган тематикалык тегерек стол уюштурулуп, класста мугалимдин практикалык ишмердүүлүгүн чагылдырган мастер-класстар өткөрүлдү.

Соңунда секциялык иштердин жыйынтыгы жарыяланып, конференциянын резолюциясы кабыл алынды. Ага ылайык, мыкты баяндамачылар уюштуруу тобу тарабынан сыйлыктарга ээ болушуп, жалпы катышуучуларга сертификаттар тапшырылды.