ОшМПУнун ТАЛАНТТАРЫ ТУШОО КЕСҮҮ КОНЦЕРТИН ТАРТУУЛАШТЫ

30-апрель күнү Ош мамлекеттик педагогикалык университетинин сыймыктуу бүтүрүүчүлөрү Жеңишбек Шакиров жана Майрамбек Шакировдор “Ата-эне” аттуу тушоо кесүү концертин өткөрүшүп, элден бата алды.

Иш чара Султан Ибраимов атындагы Ош Улуттук Драма Театрында өтүп, мында кеченин ээлери өз чыгармачылыктарын жогорку деңгээлде көрсөтүп, элдин алкоосуна татышты. Кечени алардын чыгармачылыктагы сахналаш агайлары, эжелери, достору, “Navat” эстрадалык тобу жана “Нуска” фольклордук тобу коштоп, күйөрмандарга мыкты маданий эс алуу кечесин тартуулашты.

Концерттин жүрүшүндө ОшМПУнун ректору, профессор Бекмурза Зулуев куттуктоо сөзгө чыгып, эки таланттын чыгармачылык кечеси өзгөчө даярдык менен элге чыныгы эс алуу тартуулаган мыкты иш чара болуп жатканын белгилеп өтту.

Ошондой эле ректор чыгармачылыкка чогуу аттанган эки мырзанын студент учурундагы жетишкендиктерин, окуу жайдагы эмгектерин жана учурдагы маданият тармагындагы алгылыктуу кадамдарын эске алып университеттин ардак грамотасын жана акчалай сыйлыгын тапшырды.

Белгилей кетсек Майрамбек менен Жеңишбек ОшМПУнун Музыкалык-педагогикалык факультетин ийгиликтуу аякташып, учурда Майрамбек Ош облустук филармониянын артисти болуп иштеп жатса Жеңишбек ОшМПУнун окутуучусу болуп эмгектенишүүдө.

Алар жаш обончу жана аткаруучу катары мыкты чыгармалары менен коомчулукка таныла башташты.