МАМЛЕКЕТТИК ТИЛ КҮНҮН УТУРЛАЙ АЛГАЧКЫ СЕМИНАР ӨТТҮ

Бүгүн Ош мамлекеттик педагогикалык университетинде студенттер үчүн “Кызыгы көп кыргыз тили” аталышында семинар болуп өттү.

Иш чара мамлекеттик тилдин 34 жылдыгына карата жарыяланган бир айлыктын алкагында уюштурулуп, мында улуттук баалуулуктар, кыргыз тилинин өзгөчөлүгү, жаңы кабыл алынган мыйзам долбоорунун артыкчылыктары, учурдагы көрнөк – жарнактардагы одоно каталар жана смартфондук тиркемелердеги тилибизге байланыштуу маселелер туурасында маалымат берилди.

Аталган саамалык окуу жайдын бардык факультеттеринде окуган студенттер үчүн айлампа иретинде өткөрүлүп, мындан ары да уланат. Белгилей кетсек, семинар окуу жайдын мамлекеттик тилди өнүктүрүү борбору жана жаштар комитети менен биргеликте уюштурулду.