ОКУУ ЖАЙДЫН 1-КУРСУНУН СТУДЕНТТЕРИ РЕКТОР МЕНЕН ЖОЛУГУШТУ

Бүгүн Ош мамлекеттик педагогикалык университетинин ректору Бекмурза Зулуев окуу жайдын биринчи курсунун студенттери менен жолугушуусу болду.

Аталган жолугушууда алгач окуу жайдагы ар бир студент билүүгө тийиш болгон жайлар, бөлүмдөр, борборлор тууралуу видео тасма көрсөтүлүп, андагы мүмкүнчүлүктөр туурасында кеңири маалымат берилди. Андан соң ректор студенттерди окуу жайдын администрациялык түзүмү, бөлүмдөрдүн жетекчилери менен тааныштырып, алар менен тыгыз байланышта болууга чакырып өттү.

Аны улай ректор студенттер менен жакындан баарлашып, алгач студенттер үчүн университетте түзүлгөн мүмкүнчүлүктөр, мобилдүүлүк программасы, студенттик долбоорлорду ишке ашыруу, илимий макалаларды жазуу, чыгармачылыгын өнүктүрүү, республикалык, эл аралык аренадагы уюштурулган олимпиада жана сынактарга катышуу боюнча бир топ мүмкүнчүлүктөрдү тааныштырып өттү.

Ошондой эле университеттин расмий сайт, электрондук китепканасы, avn билим порталы жана ChatGPT-чат ботун колдонуу туурасында да кенен маалыматтар берилди.Соңунда студенттер тарабынан ар кандай суроолор берилип, тиешелүү адистер жооп беришти.

Эскерте кетсек, жолугушуунун экинчи бөлүгүндө ректор колледждин студенттери менен жолугушуп, жакындан баарлашат.