“КЫРГЫЗТЕСТ” МАМЛЕКЕТТИК МЕКЕМЕСИ ОШТО ТЕСТИРЛӨӨ ЖҮРГҮЗҮҮДӨ

“Кыргызтест” мамлекеттик тилди билүү деңгээлин аныктоочу тестирлөө Ош облусу боюнча Ош мамлекеттик педагогикалык университетинде өткөрүлүүдө.

2023-жылдын 2-октябрынан тарта “Кыргызтест” мамлекеттик мекемеси мамлекеттик тилди билүү деңгээлин аныктоо үчүн жеринде көчмө тестирлөө жүргүзүп жатат. Ага ылайык окуу жайдын башкы корпусунун электрондук китепканасында Ош облусунун мамлекеттик жана муниципалдык кызматкерлери тест тапшырышууда.

Кыргыз тест системасында катышуучулар 5 субтестти камтыган тапшырмаларды аткарышып, ал үчүн эң жөнөкөй, базалык, ортоңку, ортодон жогорку жана эң жогорку беш деңгээл каралган. Мыйзам боюнча бардык мамлекеттик кызматкерлер кыргыз тилин жөнөкөй жана базалык деңгээлде милдеттүү түрдө билүүсү зарыл.

Мамлекеттик тил боюнча тестте лексикалык нормаларды жана грамматикалык эрежелерди иш жүзүндө колдоно алуу, маалыматты угуп, окуп түшүнө билүү жагы бааланат. Аны ийгиликтүү тапшыргандарга тиешелүү денгээлдердеги сертификаттар тапшырылат.