ОшМПУда СТУДЕНТТЕРДИН ЭЛ АРАЛЫК КҮНҮ БЕЛГИЛЕНДИ

Бүгүн Ош мамлекеттик педагогикалык университетинде 17-ноябрь Бүткүл дүйнөлүк студенттердин күнү белгиленип, майрамдык салтанат өткөрүлдү.

Иш чаранын алгачкы бөлүгүндө “Алло, таланттарды издейбиз” кароо-сынагынын жеңүүчүлөрүнүн гала концерти тартууланып, мында студенттер өзгөчө шаң менен майрамдык кечеде өз таланттарын көрсөтүштү.

Андан соң университеттин окуу иштери боюнча проректору Каныбек Раимбеков куттуктоо сөзүн сүйлөп, майрамдык кече сыйлоо аземи менен уланды.

Окууда жана коомдук иш чараларга дилгирлик көрсөтүп, ийгилик жаратып келе жаткан студенттер Ардак грамота жана акчалай сыйлыктарга ээ болушту.

Бул менен бирге спорт тармагында спартакиада, мелдештерде мыкты жетишкендиктерге жеткен студенттерге кубок, диплом жана акчалай сыйлыктар тапшырылып, түрдүү саамалыктарда окуу жайдын намысын коргогон активдүү студенттерге окуу жайдын атынан сыйлыктар берилди.

Ошондой эле ОшМПУнун ардактуу окутуучусу, тарыхчы маркум Турсун Абжаловдун урматына үй бүлөсүнүн атынан тарых адистигинде билим алган 2 студентке 5000 сомдон стипендия ыйгарылды.

Жалпы студент досторду бүгүнкү майрамы менен кызуу куттуктайбыз!