РЕКТОРДУН БИЛИМ КУБОГУНУН ТӨРТҮНЧҮ АЙЛАМПАСЫ ӨТТҮ

Бүгүн Ош мамлекеттик педагогикалык университетинде ректордун “Билим кубогу” ойнотулду.

Иш чара КРнын Президентинин Мамлекеттик тил жана тил саясаты боюнча улуттук комиссия тарабынан белгиленген “Кыргыз тили жана Айтматов ааламы” аталышында жарыяланган үч айлыктын алкагында уюштурулуп, мында 6 факультеттен тандалып чыккан билимдүүлөр ат салышты.

Жаштардын билимин жана интеллектуалдык деңгээлин өнүктүрүүгө багытталган бул таймашта катышуучулар улуттук баалуулуктар, Кыргызстандын улуу инсандары, накыл кептер, логика, сөз байлык жана залкар жазуучу Чыңгыз Айтматовдун чыгармаларын камтыган суроолорго жооп берип, бүйүр кызыткан таймаш курушту.

“Ректордун байгесине арналган кубоктор спорт жаатында эле ойнотулуп келсе, аталган сынакта ректордун кубогунун билим үчүн коюлушу мени абдан кубандырды” -,деп билдирди калыстар тобунун жетекчиси Тургунбай Алдакулов.

Жыйынтыгында атайын түзүлгөн калыстар тобунун чечими менен 3-орунду Кыргыз Россия факультетинин студенти Омар Мажитов, 2-орунду музыкалык – педагогикалык факультетинин студенти Нурпери Ысмаилова, ал эми 1-орунду математика жана компьютердик технологиялар факультетинин студенти Венера Рысбаева багындырды.

Белгилей кетсек, аталган билим таймаш окуу жайдын Мамлекеттик тилди өнүктүрүү борбору тарабынан уюштурулду.