СТУДЕНТТЕР КЕРЕКТӨӨЧҮЛӨРДҮН УКУКТАРЫН КОРГОО ЖӨНҮНДӨ МААЛЫМАТ АЛЫШТЫ

Ош мамлекеттик педагогикалык университетинде 15 – март Бүткүл дүйнөлүк керектөөчүлөрдүн укуктары күнүнө карата адистер менен студенттер ортосунда жолугушуу уюштурулду.

Саамалык окуу жайдын жетекчилиги тарабынан уюштурулуп, ага окутуучулар жана студенттер катышты. Иш чаранын коноктору Кыргыз Республикасынын экономика жана коммерция министрлигине караштуу Монополияга каршы кызматынын Ош шаары боюнча бөлүмүнүн башкы адиси Манас Мухамбет уулу жана жетектөөчү адиси Жоомарт Рысбаев болду.

Мында коноктор катышуучуларга керектөөчү, даярдоочу, аткаруучу, сатуучу, ылайыктуулук сертификат түшүнүктөрү боюнча маалымат берилип, товарларды сатып алууда сатуучулар менен болуучу мамилелерде студенттердин укуктары, алардын укуктарын коргоо жагынан мамилелерди укуктук жөнгө салуу, сапаты жакшы жана ден соолук үчүн коопсуз туура товарларды сатып алуу жана ушул укуктарды жүзөгө ашыруу механизми туурасында кеңири айтып беришти.

Ошондой эле адистер товарларды сатып алууда керектөөчүнүн укугу бузулса даттануу менен Кыргыз Республикасынын Экономика жана коммерция министрлигине караштуу Монополияга каршы жөнгө салуу кызматына, укук коргоо органдарына, өз ыйгарым укуктарынын чегинде сотко чейинки коргоону жүзөгө ашырган керектөөчүлөрдүн коомдук бирикмелерине кайрылууга болот экендигин баса белгилешти.

Маалымат иретинде: бул күн 1983-жылдын 15-мартында бүткүл дүйнөлүк керектөөчүлөрдүн укуктары күнү катары эл аралык майрам календарына киргизилген жана андан бери жыл сайын өткөрүлүп келет. Кыргыз Республикасында керектөөчүлөрдүн укуктары күнү 1997-жылдын 10-декабрында "Керектөөчүлөрдүн укуктарын коргоо жөнүндө" Кыргыз Республикасынын Мыйзамы кабыл алынгандан кийин таанылган.