БИЛИМ БЕРҮҮ ЖАНА ИЛИМ МИНИСТРИ ДОГДУРКҮЛ КЕНДИРБАЕВА ОшМПУда

Бүгүн Кыргыз Республикасынын билим берүү жана илим министри Догдуркүл Кендирбаева Ош мамлекеттик педагогикалык университетинин жамааты менен жолугушту.

Министрди окуу жайдын ректору Бекмурза Зулуев тосуп алып, алгач университеттин жаңы окуу корпусунун материалдык-техникалык базасы жана студенттер үчүн түзүлгөн мүмкүнчүлүктөр менен жакындан тааныштырды. Бул менен катар заманбап техникалык каражаттар жана инновациялык программалардын жардамы менен өтүлгөн жаш окутуучулардын сабактарына, студенттердин чыгармачылык, ишкердик жаатындагы эмгектерине күбө болушту.

Андан соң министр университеттин профессордук – окутуучулук курамы менен жолугушуп, мында “Алтын казык” билим берүүнү трансформациялоо программасы менен тааныштырып, билим берүүнүн бардык баскычын камтыган программанын багыттары жөнүндө толук маалымат берди жана12 жылдык билим берүү долбоорун ишке ашыруу менен өлкөнүн билим берүү тармагындагы бир канча көйгөйлүү маселелер жолго коюларын билдирди.

Ага катар долбоордун алкагында педагогикалык багыттагы жогорку окуу жайларга атайын жүктөмдөр жүктөлөөрүн белгилеп, бардык билим берүү мекемелери жакындан көмөк көрсөтүүсү зарыл экенин айтты.

Жолугушуунун жыйынтыгында окутуучулардын айрым сунуш-пикирлерин кабыл алуу менен окуу жайдын педагогикалык багыттагы алгылыктуу ишмердүүлүгүнө ыраазычылык билдирип, ийгиликтерди каалады.