ОшМПУда 1-ОКТЯБРЬ ЭЛ АРАЛЫК КАРЫЛАР КҮНҮНӨ КАРАТА КАЙРЫМДУУЛУК АКЦИЯСЫ ӨТТҮ

Ош мамлекеттик педагогикалык университетинде 1-октябрь Эл аралык карылар күнүнө карата кайрымдуулук акциясы уюштурулду.

Акция окуу жайдын гуманитардык факультетинин социалдык иштер жана коомдук илимдер кафедрасы тарабынан өткөрүлүп, ага факультеттин окутуучулар жамааты жана студенттери активдүү катышуу менен ыктыярдуу түрдө каражат чогултуп беришкен.

Иш чара кафедранын окутуучусу Айзирек Курманбекованын жетекчилиги менен “Ар бир адам улгаят, ошондуктан карыларга көрсөтөлү сый-урмат!” аталышында өттү. Мында ыктыярчылар чогулган каражатка Ош шаарындагы жардамга муктаж, улуу муундагы жарандардын үй-бүлөсүнө азык- түлүк баштыкчаларын алып барышып, ак баталарын алып кайтышты.

Бул сыяктуу кайрымдуулук акциялар студенттерди боорукерликке, камкордукка чакыруу, сый – урмат көрсөтүүгө тартуу максатында жыл сайын өткөрүлүп келет.