ОшМПУнун ГУМАНИТАРДЫК ФАКУЛЬТЕТИНДЕ ИЛИМИЙ ДИСКУРС ӨТКӨРҮЛДҮ

Бүгүн Ош мамлекеттик педагогикалык университетинин гуманитардык факультетинде илимий дискурс уюштурулду.

Саамалыка окуу жайдын илимий иштер боюнча проректору Равшан Абсатаров, гуманитардык факультетинин деканы Нурбек Маткаримов жана окутуучулар катышты. Мында профессор К. Зулпукаровдун илимий мектебинин мүчөсү, окутуучу Гүлнара Акылбекованын “Улуттук лингвомаданияттагы табу түшүнүгү: адабий чагылдыруу жана лингвокогнитивдик анализ” аттуу илимий макаласы талкууга алынды.

Илимий дискурста кыргыз эл жазуучусу Топчугул Шайдуллаеванын "Балакана" аттуу аңгемесинде улуттук лингвомаданияттагы табу түшүнүктөрүнүн көркөм адабий дискурста иштелиши кызуу талкууланды. Ага ылайык көркөм адабияттагы табу концептине лингвокогнитивдик анализ жүргүзүү, изилденүүчү Гулнара Акылбекованын жетишкендиги деп бааланды.

“Мындай илимий талкуулардын ар бир факультетте өткөрүлүп туруусу-университеттин илимий потенциалынын өнүгүүсүнө жол алат. Бүгүнкү талкууга алынган макаланы да “ОшМПУ жарчысы” журналына басууга сунуштайм. Бул илимий талкуу филология багытындагы илимпоздор, окутуучулар жана аспиранттар үчүн жемиштүү болду деп ойлойм”-дейт Равшан Абсатаров

Белгилей кетсек аталган иш чара Кара-Кыргыз автономиялуу облусунун түзүлгөндүгүнүн 100 жылдыгына жана мамлекеттик тилдин үч айлыгынын алкагында университеттин илимий иштери боюнча проректору Равшан Абсатаровдун демилгеси менен уюштурулду.