СПОРТТУК МЕЛДЕШТИН ЖЕҢҮҮЧҮЛӨРҮ СЫЙЛАНДЫ

Бүгүн Ош мамлекеттик педагогикалык университетинде студенттер ортосунда уюштурулган спорттук мелдештин жеңүүчүлөрү аныкталып, сыйлоо аземи уюштурулду.

Саамалык окуу жайдын чоң жыйындар залында өткөрүлүп, ага университеттин окуу иштери боюнча проректору Каныбек Райимбеков, жаштар комитетинин төрагасы Чыңгыз Кадырмамат уулу, окутуучулар жана студенттер катышты.

Мында 17-ноябрь-Эл аралык студенттер күнүнө карата өткөрүлгөн факультеттер аралык жана окуу жайга жаңыдан келген 1-курстун студенттери ортосунда уюштурулган спорттук мелдештердин жеңүүчүлөрүнө жана активдүү катышуучуларына диплом жана акчалай сыйлыктар тапшырылды.

Белгилей кетсек саамалык студенттерди дене тарбиялык жана руханий жактан өнүктүрүү, спортко болгон жөндөмдүүлүгүн арттыруу жана жаштар арасында мыкты спортчуларды аныктоо максатында уюштурулган.