ОшМПУ “МЫКТЫ ЖОГОРКУ ОКУУ ЖАЙ” СЫЙЛЫГЫНА ЭЭ БОЛДУ

ОшМПУ “МЫКТЫ ЖОГОРКУ ОКУУ ЖАЙ” СЫЙЛЫГЫНА ЭЭ БОЛДУ

Ош мамлекеттик педагогикалык университетине мамлекеттик тилди өнүктүрүүгө кошкон салымы жана жогорку деңгээлдеги иш чараларды уюштургандыгы үчүн Ош шаардык мэриясы тарабынан “МЫКТЫ ЖОГОРКУ ОКУУ ЖАЙ” сыйлыгы ыйгарылды.

Аталган сыйлык Ош шаардык мэриясы тарабынан уюштурулган Кара-Кыргыз автономиялуу облусунун түзүлгөндүгүнүн 100 жылдыгы, “Кыргыз Республикасынын мамлекеттик тили жөнүндө” мыйзамынын кабыл алынгандыгынын 35 жылдыгы жана Улуттук адабият күнүнө карата Бабур атындагы Ош мамлекеттик өзбек музыкалык драма театрында өткөн жыл жыйынтыктоочу иш чарада салтанаттуу тапшырылды.

Иш чарага Ош шаарынын мэринин орун басары Нурбек Кадыров, КР Президентине караштуу Мамлекеттик тил жана тил саясаты боюнча улуттук комиссиясынын төрагасы Мелис Мураталиев, шаардык мекеме-ишканалардын, муниципалдык аймактык башкармалыктардын, билим берүү мекемелердин жетекчилери жана студенттер катышты.

Саамалыктын жүрүшүндө “Кыргыз иденттүүлүгү” темасы боюнча баяндама айтылып, көргөзмөлөр уюштурулду. Ошондой эле Мамлекеттик тилди өнүктүрүүгө салым кошкон бир катар мекеме, ишканалар, жогорку окуу жайлар Ош шаарынын мэриясынын ыраазычылык баракчасы жана белектери менен сыйланышып, концерттик программа тартууланды.