ОшМПУ: РЕКТОРДУК БАЛ-2024

20-декабрь күнү Ош мамлекеттик педагогикалык университетинде жаңы жылды утурлай ректордук бал болуп өттү.

Иш чара жаштар комитети тарабынан уюштулуп, ага университеттин ректору Бекмурза Зулуев, окуу иштери боюнча проректор Каныбек Раимбеков, профсоюз комитетинин төрагасы Кубанычбек Жылкычы уулу, Ош шаардык мэриясынын жаштар иштери боюнча комитетинин өкүлдөрү, факультеттердин тарбия иштери боюнча декандын орун басарлары жана окуу жайда билим алып жаткан бардык курстун студенттери катышты. Алгач иш чараны университеттин ректору Бекмурза Зулуев ачып, жаштарды жаңы жыл майрамы менен кызуу куттуктап өттү. Ошондой эле ректор ар тараптуу ийгиликтерди багындырган алдыңкы студенттерге окуу жайдын Ардак грамота жана акчалай сыйлыктарын тапшырды.

Бул менен бирге Ош шаарынын жаштар саясатын өнүктүрүүгө салымын кошкон таланттуу студенттер Ош шаардык мэриясынын сыйлыктарына татыды.

Мындан сырткары жыл жыйынтыгы менен мыкты деп табылган 10 студентке жеке ишкер Курсант Сатыбалдиевдин демөөрчүлү астында 2000 сомдон стипендия тапшырылды.

Келе жаткан жылан жылын окуу жайдын студенттери өзгөчө маанайда тосуп алуу алдында турушат. Мында Жаштар комитетинин таланттуу студенттери тарабынан вальс бийи аткарылып, “Vipstar” тамашоу командасы катышуучуларга жагымдуу маанай тартуулашты. Ошондой эле кечеде түрдүү оюн-зоок жана лотереялар уюштурулуп, окуу жайдын ректору жана профсоюз комитети тарабынан жаңы жылдык белектер таратылды. Майрамдык кечени жаштар шаңдуу ыр-бийлердин коштоосунда жыйынтыкташты.

Жаңы жылыңыздар менен кызуу куттуктайбыз!