ОшМПУ ЖАМААТЫ ЖАҢЫ ЖЫЛДЫК КЕЧЕДЕ

Ош мамлекеттик педагогикалык университетинин жамааты узап бараткан балык жылына кош айтуу менен жаңы 2025-жылан жылын утурлай жыл жыйынтыктоочу кече уюштурду.

Ага ылайык окуу жайдын жалпы эмгек жамааты “Олигарх” ресторанында эски жылды узатып, жаңы жылды тосту. Кечеге университеттин ректору Бекмурза Зулуев баштаган жетекчилик жамаат жана профессордук-окутуучулук курам катышып, майрамды жогорку маанайда белгилешти.

Саамалыктын жүрүшүндө жыл ичинде окуу жайдын илимий, маданий жана спорт тармагынын өнүгүүсүнө өзгөчө салым кошкон окутуучулар КР Билим берүү жана илим министрлигинин Ардак грамотасы, “Билим берүүнүн мыктысы” төш белгиси, облустун, республиканын, Ош шаардык мэриясынын жана ОшМПУнун Ардак грамоталары, ыраазычылык каттары менен сыйланышты. Бул менен бирге окуу жайдын профсоюз комитети тарабынан да өзгөчө номинациялар менен жыл мыктылары аныкталып, диплом жана баалуу белектер тапшырылды.

Ошондой эле кечеге катышкан ар бир кызматкерге профсоюз комитети тарабынан майрамдык белектер таратылды. Майрамдык салтанатты дене тарбия жана музыкалык-педагогикалык факультети уюштуруп, мында жагымдуу чыгармалар, ыр-бийлер, кызыктуу оюн-зооктор, түрдүү жолдомолор ойнотулуп, катышуучуларга жогорку деңгээлдеги майрамдык маанай тартууланды.