ОшМПУда УКМК кызматкери тарабынан старосталарга жыйын өткөрүлдү

Бүгүн Ош мамлекеттик педагогикалык университетинде Улуттук коопсуздук боюнча мамлекеттик комитетинин кызматкеринин катышуусунда коррупцияны алдын алуу жана жоюу маселеси боюнча старосталар үчүн жыйын өткөрүлдү.

Иш чарага УКМКнын Оштогу кызматкери, ОшМПУну көзөмөлдөгөн куратор, университеттин ректору Бекмурза Зулуев, 6 факультеттин жана колледждин бардык старосталары катышты.

Жолугушууда ректор Бекмурза Зулуев алгач студенттерге жыйындын максаты тууралуу түшүндүрмө берди. Бул менен бирге окутуучулар менен старосталар тыгыз байланышта болгондуктан аларды мындай терс көрүнүштөрдөн оолак болууга чакырып, жетекчилик тарабынан коррупция боюнча олуттуу эскертүүлөрдү берди. Аны улай 2024-жылы Ош шаарында жана Ош облусунда окуу жайларда жүз берген коррупцияга каршы күрөшүү боюнча бети ачылган кылмыштар туурасында видео тасма көрсөтүлдү.

Жыйындын жүрүшүндө куратор старосталарга коррупцияга каршы аракеттенүү чөйрөсүндөгү Кыргыз Республикасынын айрым мыйзам актыларындагы беренелерге өзгөртүүлөр киргендигине токтолду. Ошондой эле коррупциялык элементтер камтылган көрүнүштөрдөн мисал келтирип, анын кесепеттерин айтып, тиешелүү укуктук жоопкерчиликтерге, жазалардын күчөтүлүшүнө кеңири токтолуп, коррупциялык иштерди болтурбоо максатында түшүндүрүү иштерин жүргүздү.

Соңунда студенттер өздөрүн кызыктырган суроолоруна жооп алышты. Эскерте кетсек буга чейин коррупцияга каршы түшүндүрүү иштери окутуучуларга да уюштурулган.