“КЕСИБИМ – КЕЛЕЧЕГИМ” ФОРУМУНУН БИРИНЧИ ЭТАБЫ ЖҮРҮҮДӨ

Ош мамлекеттик педагогикалык университетинин “Кесибим – келечегим” аталышындагы форуму бул жылы үчүнчү ирет старт алды.

Аталган форумдун 1-туру Алай районунда өтүп, мында 50дөн ашык окуучу сынамык тест тапшырышты. Бул менен бирге окуучуларга бөлүмдүн адистери тарабынан учурдагы актуалдуу кесиптер, чет өлкөдөгү университеттер жана жергиликтүү жогорку окуу жайлар, форумдун этаптары тууралуу маалыматтар берилди. Алдыда бул иш – аракеттер Баткен облусунда, Кадамжай, Лейлек, Кара – Кулжа, Чоң – Алай райондорунда да жүргүзүлмөкчү.

Форумдун 1-этабына катышып, тесттен жогорку балл алган окуучулар “Кесибим – келечегим” аталышындагы эссе жазуу конкурсуна өтө алышат. Андан соң форумдун 2-турунда катышуучулар интеллектуалдык оюн аркылуу өз билимдерин сынашат. Жеңүүчүлөрдү өзгөчө, баалуу белектер жана мыкты кесип ээлери менен уюштурулган форум күтөт.

Саамалык окуу жайдын 100 жылдыгына карата Ош, Баткен жана Жалал-Абад облустарындагы мектеп окуучуларынын билим деңгээлин өнүктүрүү, кесипке багыт берүү жана ЖРТга даярданууга көмөк көрсөтүү максатында университеттин Мектеп мугалимдеринин квалификациясын жогорулатуу, ЖОЖго чейинки даярдоо жана үзгүлтүксүз билим берүү бөлүмү тарабынан уюштурулган.

Белгилей кетсек, өткөн окуу жылында форумга катышкан окуучулар жакшы жыйынтыктарга жетишип, өз ой-пикирлерин билдиришкен. Алардын арасында алтын сертификат, алтынга тамга алган окуучулар дагы бар.